နောက်ခံအကြောင်း

မြိတ်ကျွန်းစုတွင် အလွန်အကျွံငါးဖမ်းခြင်း၊ နေထိုင်ကျက်စားရာဘုံများ ဖျက်ဆီးခံရခြင်းနှင့် ပျက်စီးဆုံးရှုံးခြင်းတို့ကြောင့် အရေးပါပြီး များပြားစုံလင်သော အဏ္ဏဝါသတ္တဝါများ ခြိမ်းခြောက်ခံနေရသည်။ ဒေသခံများနှင့်ပူးပေါင်းစီမံခန့်ခွဲသော အဏ္ဏဝါရေပြင်ဧရိယာများ (LMMA’s) ထူထောင်ခြင်းသည် ဤသို့နေထိုင်ကျက်စားရာ ဘုံများကို ကာကွယ်ပေးနိုင်ရုံသာမက ဒေသတွင်းအသက်မွေးဝမ်းကြောင်းအလုပ်များကို ပံ့ပိုးပေးနိုင်သော နည်းလမ်းတစ်ခုဖြစ်သည်။

စီမံကိန်း

၂၀၁၇ ခုနှစ်တွင် အဓိကကျသော ဇီဝမျိုးစုံမျိုးကွဲဒေသများ ထိန်းသိမ်းရေးနှင့် ရေရှည်တည်တံ့သော ငါးဖမ်းလုပ်ငန်းများ စီမံခန့်ခွဲမှုအတွက် မြိတ်ကျွန်းစုတွင် LMMA’s သုံးခုကို ဖွဲ့စည်းတည်ထောင်ခဲ့သည်။ လငန်း၊ ဒုံးပုလဲအော်နှင့် လင်းလွန်းရှိ ထို LMMA’s များသည် မြန်မာနိုင်ငံအတွင်းရှိ အဏ္ဏဝါရေပြင်ပူးပေါင်းစီမံခန့်ခွဲရေး ငါးဖမ်းလုပ်ငန်းများအတွက် အထူးတည်ထောင်ထားသည့် ပထမဆုံး အကာအကွယ်ပေးသည့်ဒေသများကို ကိုယ်စားပြုသည်၊ မြန်မာနိုင်ငံတွင် အဏ္ဏဝါရေပြင်ဧရိယာများကို ရေရှည်စီမံခန့်ခွဲနိုင်ရန် ဒေသတွင်း ငါးဖမ်းသူများအား ခွင့်ပြုထားပြီးဖြစ်သည်။ ထိုဒေသတွင်းပြည်သူများသည် အထူးငါးဖမ်းခွင့် ရရှိကြပြီး ဒေသတွင်းရှိ အဏ္ဏဝါရေပြင်ဘုံနေရာများနှင့် ဇီဝမျိုးစုံမျိုးကွဲများကို ကာကွယ်စောင့်ရှောက်ရန်တာဝန်ကို ထမ်းဆောင်ကြရသည်။ နောက် ၃ နှစ်အတွင်း အဏ္ဏဝါရေပြင်ဧရိယာ ၄ ခုကို ထူထောင်ပြီး LMMA ပုံစံမှတစ်ဆင့် ရေရှည်စီမံခန့်ခွဲမည်ဖြစ်သည်။

အဖွဲ့အစည်း

၁၉၀၃ ခုနှစ်တွင် ထူထောင်ခဲ့သော အပြည်ပြည်ဆိုင်ရာ တောရိုင်းတိရစ္ဆာန်နှင့် သဘာဝအပင်အဖွဲ့(FFI) သည် ကမ္ဘာပေါ်တွင် သက်တမ်းအရှည်ကြာဆုံး နိုင်ငံတကာ တောရိုင်းသဘာဝ ထိန်းသိမ်းစောင့်ရှောက်ရေးအဖွဲ့အစည်းဖြစ်သည်။ ၎င်း၏ မစ်ရှင်မှာ ရေရှည်တည်တံ့ပြီး လူသားတို့၏ လိုအပ်ချက်များကို ထည့်သွင်းစဉ်းစားသည့် ဖြေရှင်းနည်းများကို ရွေးချယ်ခြင်းဖြင့် ဇီဝမျိုးစုံမျိုးကွဲများကို ကာကွယ်ရန်နှင့် အန္တရာယ်ကျရောက်နေသော မျိုးစိတ်များနှင့် ဂေဟစနစ်များကို ထိန်းသိမ်းရန် ဖြစ်သည်။