နောက်ခံအကြောင်း

ကချင်ပြည်နယ်တွင် တည်ရှိသော အင်းတော်ကြီးကန်သည် မြန်မာနိုင်ငံ၏ အကြီးဆုံးရေကန်ဖြစ်သည်။ ကန်ဘေးပတ်ဝန်းကျင်ရှိ စိမ့်မြေများနှင့် သစ်တောများသည် မျိုးတုန်းလုအန္တရာယ် ရင်ဆိုင်နေရသော တောရိုင်းတိရစ္ဆာန်များနှင့် ဒေသခံပြည်သူများအတွက် အရေးကြီးသော ဂေဟစနစ်များဖြစ်သည်။ သို့သော် ဖွံ့ဖြိုးတိုးတက်မှု လျင်မြန်လာခြင်း၊ သဘာဝရင်းမြစ်များကို ဝယ်လိုအား တိုးပွားလာခြင်းနှင့် တရားမဝင်လုပ်ဆောင်ချက်များသည် ဒေသ၏ ဂေဟစနစ်များနှင့် ဇီဝမျိုးစုံမျိုးကွဲတို့အပေါ် ခြိမ်းခြောက်လျက်ရှိသည်။

စီမံကိန်း

FFI သည် ၂၀၀၈ ခုနှစ်တွင် အင်းတော်ကြီးကန်အတွင်း ဇီဝမျိုးစုံမျိုးကွဲဆိုင်ရာ သုတေသန စတင်ပြုလုပ်ခဲ့ပြီး အင်းတော်ကြီးကန်ချိုင့်ဝှမ်းကို UNESCO ဇီဝအဝန်းနယ်မြေအဖြစ် သတ်မှတ်ခံရစေရန် ပံ့ပိုးကူညီခဲ့သည်။ ထိုအချိန်မှစ၍ FFI သည် အစိုးရ၊ ဒေသတွင်း CSO များနှင့် အသိုင်းအဝိုင်းများနှင့် ပူးပေါင်းပြီး သဘာဝစုပေါင်းထိန်းသိမ်းကာကွယ်ရေးဧရိယာ စီမံခန့်ခွဲမှု၊ ဒေသခံပြည်သူအစုအဖွဲ့ပိုင်သစ်တောလုပ်ငန်း၊ အော်ဂဲနစ် စိုက်ပျိုးရေး၊ အရှည်တည်တံ့ရေး ငါးဖမ်းလုပ်ငန်းများ၊ သဘာဝအခြေခံ ခရီးသွားလုပ်ငန်းနှင့် ပညာရေးအပါအဝင် နယ်ပယ်အများအပြားတွင် ပံ့ပိုးကူညီခဲ့သည်။ အင်းတော်ကြီးကန်၏ အရှည်တည်တံ့ရေးအနာဂတ်အတွက် အရေးကြီးသော သမိုင်းမှတ်တိုင်တစ်ခုမှာ ၂၀၁၈ ခုနှစ် ဒီဇင်ဘာလတွင် ပတ်ဝန်းကျင်ထိန်းသိမ်းရေး ပညာပေးပြခန်းကို ဖွင့်လှစ်တည်ထောင်နိုင်ခဲ့ပြီး ၎င်းသည် ဧည့်သည်များအတွက် သဘာဝအခြေခံ ခရီးသွားလုပ်ငန်းဝန်ဆောင်မှုနှင့် ဒေသခံပြည်သူများအတွက် ဝင်ငွေပေးစွမ်းနိုင်ရုံသာမက ပါဝင်သူအားလုံးအတွက် လေ့လာရေးနှင့် မျှဝေရေးဗဟိုချက်တစ်ခုအဖြစ်လည်း တည်ရှိနေသည်။

အဖွဲ့အစည်း

၁၉၀၃ ခုနှစ်တွင် ထူထောင်ခဲ့သော အပြည်ပြည်ဆိုင်ရာ တောရိုင်းတိရစ္ဆာန်နှင့် သဘာဝအပင်အဖွဲ့(FFI) သည် ကမ္ဘာပေါ်တွင် သက်တမ်းအရှည်ကြာဆုံး နိုင်ငံတကာ တောရိုင်းသဘာဝ ကာကွယ်စောင့်ရှောက်ရေးအဖွဲ့အစည်းဖြစ်သည်။ ၎င်း၏ မစ်ရှင်မှာ အရှည်တည်တံ့ပြီး လူသားတို့၏ လိုအပ်ချက်များကို ထည့်သွင်းစဉ်းစားသည့် ဖြေရှင်းနည်းများကို ရွေးချယ်ခြင်းဖြင့် ဇီဝမျိုးစုံမျိုးကွဲတို့ကို ကာကွယ်ရန်နှင့် အန္တရာယ်ကျရောက်နေသော မျိုးစိတ်များနှင့် ဂေဟစနစ်များကို ထိန်းသိမ်းစောင့်ရှောက်ရန် ဖြစ်သည်။